Ibilbideak: Bakio

Lurraldeak

Ibilbide mota

Jose-k sortua, 2016, urria 12 - 10:58
Kategoriak Bakio, Maruri-Jatabe
ABIAPUNTUA

Jatara igotzeko biderik errazena izango da honako hau, ziurrenez. Bakio eta Armintza arteko errepidetik komunikazio antenetara iristen den bidea baliatzen du tontorrera gerturatzeko. Porlanezkoa da bide hau hasieran, eta kotxearekin nahiko gora igo daiteke. Atsedenlekua baino zertxobait gorago, ur depositu baten ondoan dagoen bidegurutze bat izan daiteke abiapuntu egokia.
Bide zabal honetatik gorantz jarraituz, laster desagertuko da porlana, hartxintxarrezko bide bihurtuz. Aldapa leuneko zuzengune batek Jatako bi tontorren arteko lepora eramaten du.

Jose-k sortua, 2012, abendua 6 - 20:45
Kategoriak Bakio, Bermeo, Sukarrieta
ABIAPUNTUA Bakio
Eskema Bakio - San Pelaio - Burgoa - Garbola - Sollube mendatea - Katillotxu - Sukarrieta

GR 123 Bizkaiko Biraren 2. etapak Bakio eta Sukarrieta lotzen ditu. 3 tontorretatik pasatzen den arren (Burgoa, Garbola eta Katillotxu), gorabehera gutxiko etapa da. Gainera, ez da beharrezkoa aipatutako tontorretatik igarotzea, hirurak ingura baitaitezke tontorrera igo gabe.

GRaren marka zuri-gorriak badaude, baina hemen proposatzen den ibilbideak hasieran eta amaieran baino ez ditu jarraitzen, Bizkaiko Biraren jatorrizko ibilbideari ahalik eta fidelen izateko asmoarekin, Bermeora jaitsi gabe Sollube mendatetik igarotzen baita, ahalik eta altuera gutxien galduz Katillotxura gerturatzeko.

Ibilbidearen lehenengo erdian mendi bide zabalak dira nagusi. Sollube mendatetik aurrera aldiz asfalto gainean bide luze xamarra egiten da, Katillotxuko tartea salbu.

Jose-k sortua, 2012, azaroa 11 - 12:06
Kategoriak Bakio, Gorliz, Lemoiz, Maruri-Jatabe, Mungia, Plentzia
ABIAPUNTUA Plentzia
Eskema Plentzia - Ermua - Armintza - Urizarmendi - Jata - Bakio

GR 123 Bizkaiko Biraren 1. etapa Plentziatik abiatzen da, eta Bakio du helmuga, hiru tontorretatik pasa eta gero: Ermua, Urizarmendi eta Jata. Mendi apalak izan arren, ibilbideak gorabehera asko ditu, eta ondorioz kostaldeko etapen artean gogorrena dela esango nuke.

Nahiko asfalto gutxi zapaltzen da. Mendi bide erosoak jarraitzen dira gehienean. GRaren seinale gutxi batzuk baino ez daude (2012ko udazkena), eta GPSaren laguntza eskertzen da zenbait tartetan.