Aldura

Tontor bikoitzeko mendia da, Aldura izenekoa da bata eta Pertxele bestea. Gorabehera txiki bat baino ez dago bien artean eta bata bestetik gertu daude (~500 m).

Aldura Mendebaldeko gaina da eta bera da bietan garaiena (540 m). Donostia eta Pasaia aldeko lur eremu zabalaren gaineko ikuspegi ederra eskaintzen du, txartelontzia dagoen lekutik. Bada izen bereko baserri bat Iparraldeko lepoaren inguruan.

Pertxele Ekialdeko gaina da, pixka bat apalagoa (528 m) eta ikusmira itxiagokoa. Erpin geodesikoa dago bertan. Azken honetatik Aiako Harriaren aldera jaisten den aldapan elurzulo bat ere bada, garai batean elurra pilatu eta uda partean izotza ateratzeko erabiltzen ziren zulo horietako bat.

Gipuzkoa aldeko beste mendi asko bezala Aldura basogintzan erabilitako eremu ugariz inguratuta dago, baina tarte politak ere badira goi aldean, Añarbeko urtegira jaisten den isurialdean batez ere. Aiako Harriko parke naturalaren eremuaren barruan dago neurri haundi batean.

Jende asko ibiltzen da Errenteriatik Aldurarako bidean dauden parkeetan (Listorreta, Barrengoloia, Malbazar), kale zulotik ihes egiteko modu bakarra inguru honetara etortzea baita. Aterpe gisara atondutako hainbat borda txiki bada inguruetan (Malbazar, Burkondo, Ezpalorri) eta jatetxe dotorea ere bai Idoiako lepoan (Susperregi), aparkaleku zabal batekin.

Igoera errazena Malbazar aldekoa da, Idoiako lepotik abiatuta. Pista zabal batek eramango gaitu Idoiatik Malbazarrera eta handik aurrera nahikoa da bizkarretik gehiegi aldendu gabe aldapan gora egiten duten bide zabalak jarraitzea, Pertxele eta Aldura arteko lepora heldu arte.

Bada bestela gorabehera gutxiko zeharbide bat mendi osoa inguratzen duena, ibilbide lasai bat egiteko modua eskainiz eta hainbat aterpe txikirekin: Idoiagako lepoa (jatetxe-taberna) > Malbazar(borda) > Burkondo (borda) > Ezpalaurri (borda) > Yantziko zabala > Aldura baserria > Idoiaga.

Igoin, Urdaburu eta Zaria dira gertuen dauden zerrendako mendiak eta ez da zaila ibilaldi berean hauetako beste bat harrapatzea. Igoin aldera joz gero, ezin bisitatu gabe utzi Landerbasoko leizeak.