Buruzar

Txaruta menditik soka luze bat hedatzen da iparralderantz, Otolo eta Mokorro mendietan amaitzen dena, Legasa eta Donezteberen gain-gainean. Otoloko gailurrean pagoak ikusiko baditugu ere, larrea nagusitzen da katearen gainaldean, ikuspegi zabalak eskainiz.
Buruzarko gailur zabaletik hego-ekialdera, 732 metroko altueran, Pilotasoro izeneko parajea dago. Bertan, harlauzez egindako itxitura bitxi bat aurkituko dugu. Mendiaren hegian eskegitako plataforma bitxi honen inguruan hainbat teoria daude, baina izenak adierazten duen bezala, probableena da artzainak pilotan jolastera bilduko ziren tokia izatea.