Limitacionesko pagoa

Sorta estu batean bildutako pago multzo bat ematen du, gerritik bat egindakoa. Urbasako Urederra gaineko begiratokiaren ingurutik Opakua aldera jotzen duen errepidea gertu pasatzen da, baina GPSaren laguntzarik gabe zaila da antzematen non den, pago multzo baten ertzean baitago, eta ez da bere altueragatik nabarmentzen, bere gerriaren zabaleragatik baizik. Ez da errepidean inongo seinalerik, ez eta bere inguruan (2011ko abuztua). Oraindik ere sasoi onean dagoela ematen du, ez zaio adar ustelik ikusten eta goiko adarrak ere osasuntsu ikusten zaizkio.