GR.12 Belagua - Belagua

ietxaburu-k sortua, 2018, abuztua 21 - 19:16
Ibilbide mota Itzulia, jaitsiera beste bide batetik
Zailtasuna Zailtasun gutxikoa
ABIAPUNTUA Belaguako aterpe etxea (orain itxita)
Eskema Belaguako aterpetxea-Intzolako lepoa-Hoya Portillo de Larra-Larreriako lepoa-Paso Zemeto-Belaguako aterpetxea
Lotuta »GR-12 Belagua - Belagua (track)
Gora-behera1125 m
Luzera22.4 Km
Iraupena6:00 - 8:00
Alert

Guk ezin dugu ziurtatu ibilbide hau zuretzako egokia denik, ez eta zuzen azalduta dagoenik ere, arduraz jokatu ezazu. Ibilbide hau egiten baduzu, esaiguzu mesedez egokia den ala ez, zer zailtasun topatu dituzun, zein zuzenketa egingo zenituzkeen e.a. oharra jarraian erantsiz

GR-12 ibilbideak, Euskal Herriko ur mugaren ibilbidea izan behar lukeenak, gaur egun Nafarroako zatia soilik dauka homologatua eta ibilbide honetako 9. etaparen deskribapena da ondorengoa: Belagua – Belagua.

Belaguako aterpetxea izan zenaren ondotik (1.425 m. bertan aparkatzeko lekua soberan dago) aterako gara eta ekialderantz joko. Abereek egindako bide aztarnen artean, laster ikusiko dugu nondik doazen marra zuri gorriak. Beraiek jarraitzea nahiko erraza da eta Xabiaramek Belagua-HEM ibilbidean aipatu bezala, paraje bitxi eta ederretatik Anaie edo Intzolako lepora iritsiko gara (2.027 m. 3:10). Hemen aukera daukagu ipar aldera dugun Añelarrako horma tzarretik igo eta Auñamendira igotzeko (ikusi Auñamendi mendian jarritako ibilbidea: Lescundik Auñamendira).
Orain, norabidea guztiz aldatu eta hego alderantz eta geroxeago hego-mendebalderantz egin beharko dugu paraje karstiko batetik (hobe marra zuri-gorriak ez galdu) Ukerdi mendiaren ipar aldera hurbiltzeko. Kilometro bat edo egin ondoren, Ukerdiren azpian, mendebalderantz jaisten den aran txiki batetik jarraituko dugu (beti ere marra zuri gorriei jaramon egiten) eta beste kilometro pare bat eskas ibili ondoren (arana nabarmen hestutu da), ERNE, bat batean marrak ezkerretako harkaitzetatik igotzeko adierazten digu. Orain hego aldetaranzko norabidean zulo eta arkaitzez jositako leku karstiko batean zehar kilometro bat edo egin beharko dugu, baina luzeago den irudipenarekin.
Eta halaxe, ingurua errazten hasiko da eta “Hoya del Portillo de Larra”ra jaitsiko gara (1.800 m. 4:35).
Inguru hau ezagutzen ez duenarentzat esan, hego-ekialdera kilometro batera edo gelditzen dela “Hoya de la Solana”, Linzatik Hiru erregeen Mahira joatean zeharkatzen dena.
Jarrai dezagun geurearekin. Portilla de Larra hegoalderantz zeharkatu ahala, eskubitara (mendebaldera) gu baino 150 m. garaiago den tontor bat ikusiko dugu eta bere hego aldean dagoen lepotxora eramango gaituzte marra zuri-gorriek. Orain mendebalderantz “Paquiza Linzola”ren hegaletik ia laua den bidetik kilometro pasatxo egin eta Aztaparreta lepo aldera jaitsiko da bidea. Ondoren, marrek ipar mendebalderantz eramango gaituzte “Larreria” leporaino (1.630 m. 5:45), eta Belaguara jaitsi beharrean, “Lapazarra” ezkerretik (mendiaren hego aldetik) jarraituko dugu. Lapazarra tontorra atzean utzita, eskubitara (ipar aldera) bidea jaisten hasiko da pagadi dotore batetik eta behin sakonera iristean, mendebaldera biratu eta “Paso de Zemeto”ra eramango gaitu. Zeharkatu eta Eskilzarran gaude, Hemendik hasi garen lekura 10 minutu besterik ez dira geratzen. (7:45)

Oharrak:

GR-12 Ibilbidearen zehaztasunak honako web gunean ikus daitezke, baina erdaraz http://www.mendinavarra.com/portal/files/fnmontana/documentos/Senderos/GRs/DESCRIPCION%20ETAPAS%20Y%20ANEXO%20GR%2012.pdf