Carrias

Valderejo Arabatik bereizten duen mendikate luzearen ekialdeko muturrean dago Carrias eta mugarri lana egiten du Araba eta Burgos artean. Burgosen dago ohiko abiapuntua ere, Arroyo de San Zadornil izeneko herrixkan, eta igoera horretakoak dira kate famatuak. Kate hauek gandorrera heltzeko bidea errazten dute, eta eskalatzaileek bakarrik egingo diote aurre hormari katea erabili gabe, jaisterakoan batipat. Edozein modutan, soka ere erabilgarri izan daiteke, horretarako jarrita dauden txapak erabiliz. Kateaz gain bada kable bat eta burdinazko hainbat iltze leku berean. Arroyotik datorren bidea nahiko ondo markatuta dago, harri pilekin, baina bidea galduz gero (nahiko senda bihurria da, hasieran batez ere) ez da erraza hormari nondik ekin behar zaion asmatzen. Bideari jarraituz berriz, berak erakutsiko dizue hormari non heldu behar diozuen (pintura markak ere badira, baina nahikoa urratuta daude -1993/9/14-). Kateen igoera gainditu eta gandorrera helduz gero ez du bideak aparteko zailtasunik. Bista ederrak hegoaldean nahiz iparraldean.