Arradoi

Arradoik iparraldetik menderatzen du Donibane Garaziko paisaia. Ez da oso mendi ikusgarria, eta baso sarri batek hartzen ditu bere gailur eta mazelak. Gailurretik, beraz ezer gutxi ikusteko aukera izanen dugu. Paisaia ikustekotan, hegoaldeko begiratoki-atsedenlekura joan beharko dugu. Bertatik Donibane Garazi eta Pirinioen gaineko ikuspegi ederra izanen dugu. Haraino daraman errepidexka dela medio, jende ugari ibiltzen da inguru hauetan, baina seguruenik horietatik gutxi ikusiko ditugu gailur harritsuan.