Ibilbideak: Ibilbide luze bateko etapa

Lurraldeak

Ibilbide mota

Jose-k sortua, 2017, urtarrila 29 - 22:15
Kategoriak Aiara, Amurrio, Burgos, Urduña, Urkabustaiz
ABIAPUNTUA Lendoño Goitia
Eskema Lendoño Goitia – Iturrigorri – Bedarbide – Solaiera – Txolope – Txarlazo – Urduña mendateko errepidea – Santiago – Delikako ur-jauzia – Bertzeta – Bagate – Barrerilla mendatea – Beratza – Aloria

GR 123 Bizkaiko Biraren 11. etapa bezala aurkezten den hau ez dago beste etapetako ibilbideei lotuta. Araba eta Burgoseko lurrek inguratuta eta Bizkaiko gainontzeko herrietatik bereizita dagoen Urduña eta inguruetako mendiak dira etapa honetan zeharkatzen direnak. Hortaz, gainontzeko etapen segidaren edozein unetan egin daiteke bertara jauzi, eta Orozkotik pasatzean egitea proposatzen da, Gorbeiako eta Arrolako etapen artean, gertutasunean oinarrituta.

Luzea. Oso luzea da etapa hau. Birako luzeena. Baina horretaz aparte, ibilbidea xamurra da. Urduñako auzoa den Lendoño Goitiatik abiatzen da, eta Urduñako bailara mugatzen duten Gorobel mendikateko zenbait tontor, Santiago mendia, eta Gibijo mendikatearen mendebaldeko ertza zeharkatuta, Arrastariako Aloria herrixkara jaisten da.

Behin mendi-gaina harrapatzen denetik aurrera mendi-hertza jarraitzen da ibilbide guztian zehar. Tartean tontor askotatik igarotzen da: Gorobel mendikatean Iturrigorri (Tologorri bezala ezagunagoa dena), Bedarbide, Solaiera, Txolope eta Txarlazo; Santiago mendia; eta Gibijo mendikatean Bertzeta, Bagate eta Beratza. Baina gorabeherak txikiak dira, eta beherantz gehiago gorantz baino, tontorrik altuenak ibilbidearen hasieran baitaude, eta aurrera egin ahala pixkanaka-pixkanaka altuera galtzen da.

Jarraitu beharreko bidezidorrak oso garbiak dira gainera, uneoro mendi-ertza jarraituz, esan bezala. Hortaz, luzeraz gain ez dago zailtasun aipagarririk. Baina bada kontutan izan beharreko beste kontu bat, udan batez ere. Iturri bakarra dago ibilbide osoan, eta hasieran dago gainera, Iturrigorri iturria. Ibilaldi osorako ura aldean eraman behar da beraz.

Jose-k sortua, 2015, otsaila 7 - 08:01
Kategoriak Bizkaia, Orozko, Ubide, Zeanuri
ABIAPUNTUA Ubide
Eskema Ubide – Eneabe – Bastelarra – Arralde – Arimekorta – Gorbeia – Egiriñao – Usotegieta – Oderiaga – Egileor – Kolometa – Orozko

GR 123 Bizkaiko Biraren 10. etapa bira osoko gogorrenetako bat da. Luzea eta gorabehera handikoa. Hemen azaltzen den bezala itzulia erlojuaren horratzen zentzuan eginez bigarren gogorrena dela esango nuke, Orduntekoaren ondoren. Eta kontrako zentzuan gogorrena ziurrenez, abiapuntua beherago izanik altuera handiagoa igo behar baita, eta Orduntekoan aldiz txikiagoa.

Ubidetik abiatu eta Gorbeiako mendialdea ekialdetik mendebaldera zeharkatzen da, tontor askotatik pasaz (garrantzitsuenak: Eneabe, Arralde, Gorbeia, Usotegieta, Oderiaga, Egileor eta Kolometa), Orozkoko auzune garrantzitsuena den Zubiaurren bukatzeko.

Gogortasuna alde batera utzita, ibilbideak ez du aparteko zailtasunik, egia esan. Mendizale asko ibiltzen denez paraje hauetan, bidezidorrak nabarmenak dira ia ibilbide osoan zehar.

Jose-k sortua, 2015, urtarrila 6 - 11:07
Kategoriak Aramaio, Atxondo, Legutio, Otxandio
ABIAPUNTUA Arrazola
Eskema Arrazola – Anboto – Zabalandi – Oleta – Otxandio – Esnauritzagana – Motxotegi – Ubide

GR 123 Bizkaiko Biraren aurreko etapan, jatorrizko ibilbidearekiko aldaketa bat egin genuen, eta hari jarraituz, 9. hau Urkiolatik beharrean Arrazolatik abiatzen da, Anboto kilometro bertikaletik igoz. Oleta eta Otxandio zeharkatu ondoren, Esnauritzagana eta Motxotegiko gailurrak zapaldu eta Ubiden amaitzen da.

Aurreko etapen aldean luze xamarra da, baina zailtasun nagusia Anbotoko igoera luze eta aldapatsua da, jakina. Horretaz gain ez dago zailtasun aipagarririk. Nahi izanez gero, Anboto igotzea ekidin daiteke, Arrazolatik Zabalaundi lepora igoz, aurreko etapan jaitsitako bidetik.

Jose-k sortua, 2014, abendua 14 - 09:43
Kategoriak Aramaio, Arrasate, Atxondo, Elorrio
ABIAPUNTUA Kanpazar
Eskema Kanpazar – Udalaitz – Besaide – Teilamendi – Ipiztekoarriaga – Arrazola

GR 123 Bizkaiko Biraren 8. etapan, jatorrizko ibilbideari aldaketa bat egin diogu. Kanpazar mendatetik abiatuta, Udalaitz eta Teilamendi tontorretatik igaro ondoren, Urkiolan amaitu beharrean, Arrazolara jaistea proposatzen dugu, ibilbide ezezagunago eta interesgarriago bat delako ustetan.

Aurreko etapak baino gogorragoa da, Kanpazartik Udaitzera igoera pikoa delako oso. Baina ibilbidea nabarmen arintzeko aukera dago, bai Udalaitz eta bai Teilamendi igotzea ekidin baitaitezke magaletik inguratuz. Bidea jarraitzeari dagokionez, zailtasun bakarrak Udalaitzetik Besaidera jaisterakoan daude, bidezidorra traketsa delako eta ez delako batere nabarmena, eta lainoa sartuz gero dezente gaiztotu daiteke. Gainontzean ez dago zailtasun aipagarririk.

Jose-k sortua, 2013, abendua 31 - 10:48
Kategoriak Bergara, Elgeta, Elorrio, Ermua, Zaldibar
ABIAPUNTUA Ermua
Eskema Ermua – Aixola – Erdella – Intxorta – Kanpazar

GR 123 Bizkaiko Biraren 7. etapak Ermuan du abiapuntua, eta Kanpazar mendatean helmuga, hurrengo etaparako geratuko den Udalaitzen barrenean. Bi tontorretatik pasatzen da, Erdella eta Intxorta. Etapa erreza dela esan daiteke. Labur xamarra da, eta bideak erosoak dira ibilbide osoan zehar. Bide zuzena aurkitzea erreza da gainera, ondo seinaleztatuta dagoelako eta hartu beharreko bidea zein den erraz antzematen delako ia toki guztietan.

Jose-k sortua, 2013, abendua 6 - 17:33
Kategoriak Eibar, Elgoibar, Ermua, Markin-Etxebarria
ABIAPUNTUA Urkarregi
Eskema Urkarregi – Kalamua – Garagoiti – Akondia – Usartza – Ixua – Urko – Ermua

GR 123 Bizkaiko Biraren 6. etapa laburra baina menditsua da. 4 tontorretatik igarotzen da. Kalamua (edo Maaxa), Garagoiti, Akondia (edo Arrikurutz) eta Urko, baina ezin daiteke esan etapa gogorra denik, aldaz gorako tarteak ez baitira oso luzeak. Etapa hau kontrako noranzkoan eginez gero gogorragoa izango da, Ermua Urkarregi baino beherago dagoenez goranzko tarte gehiago daudelako, Urkora igoera bereziki. Dena den, Garagoiti eta Akondiako tontorretatik pasatzea ez da beharrezkoa. Mendebaldetik ingura daitezke, gorabehera gutxirekin.

Jose-k sortua, 2013, abendua 1 - 22:02
Kategoriak Berriatua, Markin-Etxebarria, Markina-Xemein, Mendaro, Mutriku, Ondarroa
ABIAPUNTUA Ondarroa
Eskema Ondarroa – Santakrutz – Tontorramendi – Arnoate – Urkarregi

GR 123 Bizkaiko Biraren 5. etapak kostaldetik barnealderantz egiten du, Gipuzkoa eta Bizkaiko muga jarraituz, Ondarroan hasi eta Elgoibar eta Markina lotzen dituen Urkarregi mendatean amaitzen delarik. Mendi tontor batetik igarotzen da etaparen hasieran, Tontorramendi, baina aurrerago ibilbideak altuera handiagoa ere hartzen du, beste tontorrik zapaldu ez arren. Tarte gehienetan pinudietan zehar doa bidea, eta ikuspegi askorik ez du eskaintzen.

Jose-k sortua, 2013, azaroa 9 - 23:49
Kategoriak Berriatua, Ispaster, Lekeitio, Mendexa, Ondarroa
ABIAPUNTUA Ispaster
Eskema Ispaster – Otoio – Lekeitio – Mendexa – Kalamendi – Asterrika – Ondarroa

GR 123 Bizkaiko Biraren 4. etapak Ispaster, Lekeitio eta Ondarroa lotzen ditu, eta kostaldeko azkena da, hurrengo etapetan barnealderantz egiten baita. Ibilaldiaren hasieran Otoio menditik igarotzen da, eta amaiera partean Kalamendi igotzeko aukera dago. Nahiko etapa xamurra da, ez baitu gorabehera askorik eta bide zuzena jarraitzea nahiko erraza baita. Tarte askotan marka zuri-gorriak daude, baina denak ez dira Bizkaiko Birarenak, zati batzuk GR 38 Ardoaren eta arrainaren ibilbidearekin partekatzen baitira.

Jose-k sortua, 2013, azaroa 2 - 08:18
Kategoriak Ea, Elantxobe, Gautegiz-Arteaga, Ibarrangelu, Ispaster
ABIAPUNTUA Laida
Eskema Laidako kanpina – Atxarre – Atxurkulu – Ogoñoko talaia – Natxitua – Ea – Bedarona – Ispaster

GR 123 Bizkaiko Biraren 3. etapa Laidatik Ispasterrera bitartean luzatzen da, eta bi zati oso ezberdin ditu. Lehenengoa menditarra da, Atxarre eta Atxurkulu tontorretara igotzen delarik. Bigarrenean aldiz errepidea da nagusi. Hori dela eta, nahiko etapa xamurra da.

Jose-k sortua, 2012, abendua 6 - 20:45
Kategoriak Bakio, Bermeo, Sukarrieta
ABIAPUNTUA Bakio
Eskema Bakio - San Pelaio - Burgoa - Garbola - Sollube mendatea - Katillotxu - Sukarrieta

GR 123 Bizkaiko Biraren 2. etapak Bakio eta Sukarrieta lotzen ditu. 3 tontorretatik pasatzen den arren (Burgoa, Garbola eta Katillotxu), gorabehera gutxiko etapa da. Gainera, ez da beharrezkoa aipatutako tontorretatik igarotzea, hirurak ingura baitaitezke tontorrera igo gabe.

GRaren marka zuri-gorriak badaude, baina hemen proposatzen den ibilbideak hasieran eta amaieran baino ez ditu jarraitzen, Bizkaiko Biraren jatorrizko ibilbideari ahalik eta fidelen izateko asmoarekin, Bermeora jaitsi gabe Sollube mendatetik igarotzen baita, ahalik eta altuera gutxien galduz Katillotxura gerturatzeko.

Ibilbidearen lehenengo erdian mendi bide zabalak dira nagusi. Sollube mendatetik aurrera aldiz asfalto gainean bide luze xamarra egiten da, Katillotxuko tartea salbu.